“Илии сылааһа” сыах маастар кылаас оҥордо
Атырдьах ыйын 4-5 күннэригэр Мукучуга “Илии сылааһа” диэн республикатааҕы общественнай иистэнэр сыах (салайааччы Саввина Ирина Егоровна) кэлэн маастар кылаас оҥордулар. Киирии тылга олохтоох дьаһалта баһылыга Левин Н. И. тэрээһин сыалын-соругун эттэ, Ирина Егоровна байыаннай дьайыы саҕаланыаҕыттан патриотическай тыыҥҥа олоҕуран тэрийбит сыаҕын үлэтин кэпсээтэ, маастардары Нахова Сусанна Николаевнаны, Рожина Айталина Гаврильевнаны, Саввинова Яна Семёновнаны билиһиннэрдэ. Сүрүн ирдэбил - хааччыстыбалаах таҥастары тигии, “Оҕолоргутугар, бырааттаргытыгар, убайдаргытыгар оҥорор курдук ылынан туран тигиллэр. Тикпит таҥастаргыт хонтуруолу ааһаллар”, - диэтэ. Ити курдук, уустук эйэгэлээх үлэни бэрт судургутук, сып-сап быһаарда. Күргүөмнээх үлэ саҕаланна. Байыаннай дьайыы волонтердара анал байыаннай таҥаһы тигиигэ үөрүйэхтэри, ньымалары, ирдэбиллэри түргэнник ылыннылар, ол түмүгэр икки күн устата 8 хб көстүүм, 21 футболка, 15 тактическай рубашка, 40-ча снуд, 4 плащевка көстүүм тиктилэр. Маны таһынан 80-тан тахса кытыаҥҥа мөһөөччүк тигиллэн угулунна, эбии туос бэлэмнэнилиннэ.
Үлэ күргүөмнээхтик барарын туһугар олохтоох дьаһалта төһө кыалларынан усулуобуйа тэрийдэ. Общественноһы кытта үлэлэһэн ас-үөл бэлэмнэниллэ, үлэ дьонун тото-хана аһаттылар.
Төгүрүк остуолга Ирина Егоровна эттэ: “Мукучулар рекорд олохтоотугут, ол курдук 15 тактическай рубашка тиктигит”, - диэтэ. Сыах аатыттан махталын биллэрдэ. Инники былааннар торумнаннылар.
Ити курдук, патриотическай тыыннаах тэрээһин туһалаахтык ааста.
Хаартыскалар, видеолар https://drive.google.com/drive/folders/1eJiEJ4ccvlcfkGmrVlLPRfIBZZ91Yt2d?usp=drive_link
Ия Николаевна ИМ, Россия суруналыыстарын сойууһун чилиэнэ
#ВСОихнебросаем
#кыайыытуһугар
