Салама ыйааһынын сиэрэ-туома ыытылынна
Ыам ыйа сахалар былыргы үгэстэригэр, сыл бастакы ыйынан ааҕыллара. Бу күөххэ үктэнии, сайын саҕаланар ыйа, сиргэ Иэйиэхсит Айыы Хотун түһэр кэмэ. Бу кэмҥэ ытык сирдэргэ, алгыс этии, ону сэргэ биир улахан суолталаах салама ыйааһынын сиэрэ-туома оҥоһуллар.
Саламаны саас от-мас тыллыыта айыылар, иччилэр сылаанньыйбыт кэмнэригэр сылгы сиэлинэн хатыллыбыт быаҕа, араас өҥнөөх таҥастары кыбытан, Аар Хатыҥҥа ыйыыллар. Бу сайын аайы ыытыллар, Иэйиэхсит Хотуҥҥа сүгүрүйэн, уйгуну -быйаҥы, или-эйэни көрдөһөн, үтүө сайыны түстээн, Аар айылҕаны алҕыыр сиэр-туом буолар.
Ыам ыйын 25 күнүгэр ытык мааны Унаардаах Эбэбит кытылыгар, куппут-сүрбүт тардыһар, санаабыт сытар ытык сирбитигэр, ытыктанар биир кэрэ үтүө муннугар ыһыахтыыр сиргэ, Аар Хатыҥҥа салама ыйааһын сиэрин-туомун ыыттыбыт. Сирбитин, эбэбитин арыыга буспут араҕас алаадьынан күндүлээн, маанылаан уйгу -быйаҥ дьыл, ил-эйэ буоларыгар, анал байыаннай дьайыыга сылдьар буойуннарбыт этэҥҥэ сылдьалларын туһугар үрдүк күүстэргэ сүгүрүйэн, махтанан тарҕастыбыт.
В. И. Кондакова-Айтыына, алгысчыт, И.Н. ИМ, Россия суруналыыстарын сойууһун чилиэнэ
25.5.2023 сыл
Хаартыскалар, видеолар https://drive.google.com/drive/folders/1jgC-GgjPLZMO-3akVHjQCKFVnl7p_J0M?usp=drive_link
#ВСОихнебросаем
#кыайыытуһугар
